Die Oproep

Gemeenteblad van die NG Gemeente Townsview - Mei 2000

Jesus, gróót bo almal … So het die gemeente by die Paassangdiens gesing waar die lyding en sterwe van Christus op treffende wyse herdenk is. Vir ‘n kort tydjie het Skriflesing, voordrag en sang ons op die lydensweg van Christus geneem en het ons opnuut bewus geword van sy intense smaad en vernedering totdat Hy aan die kruis die hoogste prys betaal het … vir sondaars. Ons het gehoor dat Jesus uitgeroep het: "Ek voel doodsbenoud"; dat Hy gepleit het dat die lydensbeker, as dit moontlik is, by Hom moes verbygaan. Die gemeente het getuig: … uit kruishout, haat en hoon blyk duid’lik hoe die sonde die liefde ru beloon! Theo Boshoff se solo Die Houtkruis het aangrypend deur die kerk weerklink. Maar dan die boodskap: Jesus het opgestaan. W.E.G. Louw sluit sy gedig Opstanding so af: "staan hoog en rank en smetteloos die Lam!" Foto’s van die deelnemers aan die program verskyn hierby. Al die medewerkers wat op ander wyses bygedra het tot die sukses van die aand is in die program bedank: Esmé Lombard (perkussie), Danie de Lange (klank), Naomi Stiglingh (buiteblad), Chrisna de Ru (tik), Miems de Wet, Petro Hurter, Sanette Pearce en Ina Pieterse (blomme en versierings) en vrouediens (verversings). Gawie Stoltz as beplanner en koördineerder moet vermeld word, asook die gemeentekoor wat ‘n voortreflike uitvoering gelewer het.
Gemeente se aksieplan goed op dreef Inligting oor die gemeente se beplanningsaksie 2000 is tevore by ‘n oggenddiens en in Die Oproep oorgedra. Die verskillende kommissies is hard aan die werk. Die volgende projekte is reeds deur die kerkraad goedgekeur: 1. Diaken Wayne van Wyk het ‘n webblad vir die gemeente ontwerp, en dit is reeds in gebruik. Lees berig elders. 2. Die voorstel van ‘n aantal jongmense om babas jonger as 2 jaar tydens eredienste op te pas, is deur Rachel du Preez ondersoek. Hierdie diens sal vir ‘n paar Sondae afgekondig word en indien daar goeie reaksie is, sal dit voortgesit word. 3. Sending en Evangelisasie: Die projek bestaan uit twee fasette: vestiging van evangelisasiebewustheid in die gemeente evangelisasiekonferensie Ten opsigte van die vestiging van bewustheid, word die volgende beplan: Loodsing van ‘n gebedsaksie deur onderwerpe o.a. op die aankondigingstuk aan te dui; Aanbring van ‘n wêreldkaart op ‘n strategiese plek; Benutting van Die Oproep; Uitnodiging aan gemeente om betrokke te raak; Uitbouing van evangelisasie deur prediking. Implementering sal behels: Brei die kommissie uit deur gemeentelike deelname; Identifikasie van sendingprojekte vir die gemeente; Loodsing van projekte. Die kommissie se visie is geneem uit Matt. 28:18. ‘n Banier met die kommissie se leuse sal voor in die kerk aangebring word. Projek Jerusalem sal afskop. Dit behels dat die gemeentegrense op ‘n kaart afgetrek word en dat A4 grootte afdrukke aan elke lidmaat en dooplidmaat gegee word om tuis op ‘n strategiese plek aan te bring. Daar word dan vir voorbidding gevra en daardeur word die gemeente en gemeenskap elke dag in gebed opgedra. 4. ‘n Boekwinkel sal gevestig word waar geestelike boeke, CD’s, kaartjies en geskenke te koop aangebied sal word. ‘n Uitleenfasiliteit en leeshoekie sal ook geskep word. 5. Ander aksies geniet nog aandag. Chrisna du Ru
By die beplanningsvergadering
Pinkster 2000 Hemelvaartdag is vanjaar op Donderdag 1 Junie. Die Hemelvaartdiens word om 19:00 die aand in ons kerk gehou. Vanaf Maandag 5 Junie tot Vrydag 9 Junie word elke aand om 19:00 Pinksterdienste in ons kerk gehou. 11 Junie is Pinkstersondag.
Townsview Gemeente Webblad Op 14 Maart is die webblad van Townsview gemeente vir die eerste keer op die Internet gepubliseer. Die webblad is geskep as een van die aksies wat geïdentifiseer is deur "Beplanningsaksie 2000" Baie van ons gemeentelede besoek reeds die Internet op ‘n gereelde basis, en daarom het die beplanningskommissie besluit om die Internet te gebruik as ‘n manier om ‘n aktiewe webtuiste te skep, wat al die aktiwiteite van die Townsview gemeente op die Internet beskikbaar sal stel. Op die webblad kan u onder andere die weeklikse kerkprogram, aankondigings, gebedslys en jeugaksies besigtig. Daar is ook ‘n inligtingsblad met e-pos kontakte vir leraars en ander kerkraadslede, asook inligting oor die doop, huwelik, Sondagskoolprogram, ensovoorts. Op die hoofblad kan u skakels kry vir die Kerkbode, Lig vir elke Christen en andere. Ons hoop dat die gemeentelede met Internet toegang sal baat vind by die webblad en dit op ‘n gereelde basis sal kan gebruik. Die web adres is redelik lank, maar u hoef dit net een keer in te tik, waarna u dit as ‘n "Favorite" of "Bookmark" kan spesifiseer afhangende van watter webblaaier u gebruik. Die adres is as volg: http://churchzone.mweb.co.za/residents/wavwyk/index.html Die webblad word gratis bedien deur CNW wat die webbedieners van MWEB gebruik.
Op die boekrak Dié gereelde rubriek verskyn nie in hierdie uitgawe nie aangesien geen nuus oor nuwe boeke van Lux Verbi ontvang is nie. Uitgawes van Die Oproep is gereeld aan Lux Verbi gestuur sodat die firma insae kon hê in ons aanwending van hulle reklamemateriaal.	Brokkie Die 10e maand dankofferkoeverte het die bedrag van R22 030 opgelewer Die koevertjies wat R30 elk moes inbring vir die kerkherstelfonds het R19 712 voorsien. Lidmate word bedank vir hulle mooi reaksie.
Seniors verower talle pryse Ses van ons senior lidmate het mooi presteer met hulle handwerk by die intergroepdag op Alberton. Hulle verskyn op die foto hieronder.

Dopelinge Die volgende babas is sedert ons vorige uitgawe in die gemeente gedoop: Maryke Melanie van der Merwe: Mnr. en mev. T.P. van der Merwe van Mulbarton Jacques Coetzee: Mnr. en mev. A.J. Coetzee van Mulbarton Ruben Alexander van Zyl: Mnr. en mev. H.W.J. van Zyl van Pellissier, Bloemfontein Jacques Brits: Mnr. en mev. J. Brits van Linmeyer Kaitlin Smith: Mnr. en mev. W. Smith van Liefde-en-Vrede Mag die doopouers die krag en leiding van die Here ontvang om hulle doopbelofte getrou na te kom.

Nuwe intrekkers Hartlike welkom aan die volgende nuwe lidmate wat in ons gemeente ingetrek het: Mnr. en mev. S. Janse van Vuuren, Hythelaan 54, Mulbarton Mnr. en mev. S. Harding, Phillipstraat 61, Rosettenville Lukas van Mohlman, Eastraat 33, Oakdene Sanette Dennewill, Eastraat 33, Oakdene Mnr. en mev. C. van der Westhuizen, Fatima Court 1, Veronastraat, Rosettenville	In memoriam Annamarie van der Merwe is op 20 Maart oorlede. Sy was die eggenote van ouderling Japie van der Merwe. Innige meegevoel word betuig met Japie en die kinders, Jaco, Herman en Lizmari asook ander familie.
‘n Persiese spreuk lui: "As jy altyd in die sonskyn is, is jy in die woestyn!" Daar is vrugte wat net die reën kan voortbring en sekere geesteswinste wat alleen uit droefheid ontstaan. - Solly Osrovech: In kontak met God
Sononder of dagbreek – vir ons bejaardes Daar is tydens die beplanningsvergadering van die gemeente ‘n bepaalde behoefte ten opsigte van bejaardes uitgewys: Dat alle bejaardes nie altyd gereed is vir die laaste pylvak nie. Dat om bejaard te wees, jou hele lewe lank getrou kerk toe gegaan het, nie noodwendig beteken dat jy ‘n geredde Christen is nie. Dat daar ‘n behoefte bestaan vir begeleiding en meelewing. In die nuwe eeu is hierdie probleem reeds daadwerklik in Renaissance aangespreek. Die Bybelstudie is altyd getrou deur ‘n klompie lidmate bygewoon. Onder leiding van dr. Van Rensburg het hierdie lidmate ander so geïnspireer dat die Bybelstudie nou deur gemiddeld 30 persone bygewoon word. (Tydens ‘n aand-filmvertoning, wat betrekking op die lesse het, was daar 45 persone). Die tema: SONONDER OF DAGBREEK – Met God op pad, ‘n boekie deur dr. C. van Rensburg saamgestel, word met groot vrug saam met videovertonings gebruik en almal word onder die erns van bogenoemde probleem gebring. Alhoewel dit ‘n groot groep is, was daar genoeg tyd vir almal se kwelvrae, insette en werklik vrugbare besprekings. Die ouer lidmate in Renaissance is werklik dankbaar vir dr. Christo se leiding, waar ons hier in die wagkamer van die lewe wag om ons Skepper te ontmoet. Ons bid en vertrou dat al 59 lidmate in Renaissance (daar is ook reeds ‘n paar persone van ander kerke betrokke) hierdie wonderlike geleentheid om gereed te maak vir die ewige lewe, sal benut. Dankbare groeplid

Is jy ook bankrot?

Dr. Christo van Rensburg

Op ‘n dag het ‘n koning besluit om sy boeke na te gaan en te kyk wie van sy onderdane hom geld skuld. Hy kom toe met skok agter dat een onderdaan hom ‘n paar miljoen rand skuld. Die koning het hom dadelik laat haal en om ‘n verduideliking gevra.
Die man het met skaamte bely dat hy bankrot was en dus nie in staat was om die koning terug te betaal nie. Al oplossing wat die koning gehad het, was om te beveel dat die man, sy vrou en kinders en al sy besittings verkoop moes word en die opbrens gebruik word om sy skuld te betaal.
Toe die man dit hoor, het hy op sy knieë voor die koning neergeval en hom gesoebat om tog maar geduldig met hom te wees. "Gee my asseblief uitstel; ek sal u alles terugbetaal." Toe die koning die man daar voor hom op sy knieë hoor smeek, het hy hom innig jammer gekry. Oor sy skuldbrief het
hy geskrywe: "Betaal", en hom toe huis toe laat gaan.
Die bedoeling van hierdie verhaal van die Here Jesus is baie duidelik. As sondaar is ons die amptenaar wat so in die skuld is. Op ‘n treffende wyse beskrywe die Here Jesus ons absolute verlorenheid en hulpeloosheid voor God, wat die Koning is. Hierdie diepe skuld voor God beskrywe Izak de Villiers pragtig in sy gedig Balansstaat.

"O, Heer, ek dank U vir U groot geduld
met my. Ek is so in die skuld
by U. My bankstaat bly in rooi getik.
Nulle kom voor die komma by – ek sluk
soms swaar daaraan. Ek bied
so min en vra al meer krediet
en kry dit (God weet hoe!).
Ek is soms bang U roep
my in om alles te betaal
en haal my uit U waagskaal
uit as ‘n té groot risiko:
‘n Twyfelaar wat glo." '

God vergewe – omdat Hy ons liefhet. Hy weet dat almal van ons vergiffenis nodig het om die volgende dag weer op te kan staan en met die lewe aan te gaan. Daarom wil Hy ons sonde van ons verwyder so ver as wat die Ooste van die Weste af is (Psalm 103:12). Oor ons skuld wil Hy so bitter graag die woorde "Betaal!" skrywe. Maar dan verwag Hy twee dinge van ons. Die eerste vind ons in 1 Johannes 1:9:
"As ons ons sondes bely – Hy is getrou en regverdig, Hy vergewe ons ons sondes en reinig ons van alle ongeregtigheid."
Daarom dan ook die uitnodiging in Jesaja 1:18: "Kom tog, laat ons die saak met mekaar uitmaak, sê die Here …"
Die tweede ding wat God van ons verwag, vind ons in die slotgedeelte van hierdie verhaal.
Oor sy bankrot skuldbrief het daar in groot letters gestaan: Betaal! Maar toe hy daar uitstap, loop hy ‘n man raak wat hom net ‘n paar rand geskuld het. Wat op daardie oomblik in sy kop aangegaan het, kan ek nie eers raai nie. Hy het die man aan sy keel gegryp en geskree dat hy dadelik alles moet betaal. Toe die man, net soos hy, pleit vir ‘n tweede kans, wou hy niks weet nie en laat hom toe in die tronk gooi.
Natuurlik het die koning daarvan te hore gekom en die man ontbied. "Jou skurk! Ek het so pas jou skuld van ‘n paar miljoen rand afgeskryf omdat jy my om genade gesmeek het. Moes dit jou nie beweeg om dieselfde vir die ander man te doen toe hy op sy knieë voor jou kom staan het nie?" Die koning was so kwaad dat hy hierdie man in die tronk laat gooi het, waar hy gemartel is.
Dit is die tweede ding wat God van ons verwag. Duidelik staan dit opgeteken in Kolossense 3:13-14:
"Wees geduldig met mekaar en vergewe mekaar as die een iets teen die ander het. Soos die Here julle vergewe het, moet julle mekaar ook vergewe. Bo dit alles moet julle mekaar liefhê. Dit is die band wat julle tot volmaakte eenheid saambind".
Daarom word hierdie verhaal in Matteus 18:23-25 ook afgesluit met die woorde: "So sal my Vader wat in die hemel is, ook met julle maak as julle nie elkeen sy broer van harte vergewe nie."
Gaan staan tog maar voor ‘n spieël en kyk baie mooi na jouself! Is jy bankrot? Is jy ook een wat gou die bloed van die Here Jesus Christus inroep oor jou eie sondes en foute – maar haastig die bloed van jou naaste eis? Staan dan sommer daar voor die spieël en maak die saak met die Here uit. Bid die woorde van die Onse Vader in Matteus 6:12:
"Gee ons vandag ons daaglikse brood; en vergeef ons ons oortredings soos ons ook dié vergewe wat teen ons oortree; …"

' I.L. de Villiers, Leitourgos. Tafelberg. 1972

Dr. Christo van Rensburg

In Soweto is daar kinders van God

Ds. Christie van Zyl

Wanneer ‘n mens Soweto binnery, voel dit vir jou asof die groot stad met die baie mense jou insluk en jy jouself in ‘n ander wêreld bevind. Hoewel nie ver van ons bekende omgewing af nie, is Soweto ‘n unieke stad waar die verstedelikte Afrika baie duidelik sigbaar word. Net deur te let op die massas mense, honderde taxi’s, straatmarkte en tipiese Afrika-styl bedrywighede laat by jou die indruk dat daar nog so baie te leer en te ontdek is van jou eie land. Soweto is lankal nie meer’n landelike gebied nie. Dis ‘n stad en sommer ook ‘n enorme groot een. Nogtans is dit nie vreemd om tussen die straatrumoer ‘n donkiekar, melkkoei en ‘n boerbok raak te sien nie. Ons neem kennis van geweldige misdaad en armoede. Maar daar is ook blydskap en vreugde op die mense se gesigte te lees. Dit laat jou wonder of hoë Westerse standaarde werklik enige waarborg van voorspoed en geluk kan bied soos wat die meeste van ons dikwels verwag.
Tog ry ‘n mens deur woongebiede bekend as Chiawelo, Pimville, Moroka, Jabulani en Emdeni en jy wonder na die sieleheil van al die baie mense wat daar woon. Dis mense wie se daaglikse lewe nie ver staan van verkragtings en moord en gesinsgeweld nie. Op straatvlak beleef hulle hongersnood, dronkenskap en werkloosheid. En gou kom jy agter dat hulle werklik in die strate lewe, want daar is nie hoë mure om die huise waar agter jy jou kan verskans nie. Maar te midde van die negatiewe persepsie wat ons maklik oor die omstandighede daar kan hê, lewer die talle klein kerkies en moskees ‘n getuienis van die teenwoordige godsdienstigheid in hierdie swartmense se lewens. Dis nie groot gemeentes nie, maar klein groepies. Hulle glo nie almal op dieselfde manier dieselfde dinge oor God nie, maar hulle soek Hom opreg en hulle aanbid Hom met oorgawe. En dan is hulle ook nog daar vir mekaar, want hulle het mekaar elke dag baie nodig. Oor hoeveel van die inwoners van Soweto Christene is, wonder ons net soos wat ons wonder oor hoeveel van Johannesburg se mense Christene is. Feit bly staan: God se kinders is ook daar.
Ons kerk het ‘n betrokkenheid by die kerk in Soweto en omgewing wat al oor dekades strek. Dit vind op alle vlakke van die kerklike lewe plaas, maar vir ons inligting ook wat ons eie gemeente en ring betref. Sedert die vyftigerjare is die Ring van Turffontein by vier gemeentes daadwerklik betrokke by name Orlando, Mofolo, Klipspruit en Eikenhof wat elkeen deur ‘n leraar bedien word. Hoewel daar sporadies kontak gemaak word, strek ons aandeel grootliks finansieel. Gedurende die laaste finansiële jaar is daar R21 600 aan hierdie vier gemeentes oorbetaal ten einde hulle in staat te stel om die evangelie daar te verkondig. [28% van hierdie geld kom uit Townsview]. Dit is nie groot bedrae nie, maar dit maak die verskil of die werk voortgaan al dan nie. Die gemeentes bestaan merendeels uit bejaardes en enkelouers. Hulle het egter ‘n roeping om mense na die Here te lei. Verder sit hulle met die sogenaamde "lost generation" wat groot uitdagings stel. Sosiale en politieke probleme maak die taak van die kerk nie makliker nie. Ondertussen het Orlando gemeente laat blyk dat hulle nie meer geldelike steun benodig nie.
Bo en behalwe ‘n paar rand elke maand het die gemeentes by wie ons betrokke is, ons aandag en voorbidding nodig. Kom ons gee dit sonder voorbehoud vanuit die oortuiging dat God sy goeie werk sodanig wil voortsit.

Ds. Christie van Zyl

Die 16e eeuse kerklied

Gawie Stoltz

Die inspuiting wat die 16e eeuse kerklied van die volkslied gekry het, was van die allergrootste belang. Die kerklied het ontstaan deurdat ‘n volkslied aangepas is vir kerkgebruik. (Kontrafak genoem).
Enkele van ons Psalmmelodieë en ‘n hele klompie gesange is 16e eeuse Kontrafakte. Sulke Kontrafakte kan natuurlik maklik aangeleer word omdat hulle by die volksidioom aangesluit het.
Luther was waarskynlik die eerste Protestantse kerklieddigter wat ‘n Psalm berym het. Sy beroemde lied "Ein feste Burg" (‘n Vaste burg) is ‘n beryming van Ps. 46. Hierdie en ook ander Psalmberymings van hom is baie vryer as dié van Calvyn se Psalmberymers, Marot en Beza. Hulle moes in hulle berymings net die inhoud van die Bybelse Psalms weergee, terwyl Luther en sy medewerkers onder meer ook die
Die kerkliedere uit Lutherse kring was gekenmerk deur hulle ongekunsteldheid en die eenvoud en krag waarmee hulle die evangeliese waarhede gestel het. Hulle roep op tot die stryd teen die duiwel en sy trawante, maar adem ook berusting in God wat reeds die oorwinning behaal het.
Luther en sy tydgenote het nog die gebruik van die meestersangers gevolg deur self melodieë te vind vir hulle tekste. Ons is dus nie verbaas om te lees dat daar van Lutherse korale gesê is: "Luther het meer mense deur sy liedere vir die hervorming gewen as deur sy preke".

Stillekrag vier mondigwording

In 1979 het Lydia Campher by ‘n vrouediensvergadering aan mev. Johanna van Rensburg, ‘n voormalige leraarsvrou, gevra of in Townsview gemeente nie ‘n belangegroep bestaande uit senior lidmate gestig kon word nie. So het Stillekrag tot stand gekom.
Stillekrag was sedertdien baie aktief en het op 19 April sy 21ste bestaansjaar gevier. Dit het begin met tee en heerlike verjaarsdagkoek wat deur Martie Craukamp gebak is.
Susan de Lange, wat sedert die stigting tesouriere is, het voorgegaan in die plek van Kobie Small wat in die hospitaal was. Ds. Kobus Minnaar het vertel van sy en Anita se werksaamhede in Mosambiek – baie interessant.
Daarna het Lydia Campher voor die klavier ingeskuif en is gesellig gesing en verkeer. Ds. Minnaar en oom Joppie Lesch het as bobaas braaiers ontpop en die smaaklike vleis en wors voorsien vir die ete waarmee afgesluit is.
Almal het saamgestem: Dit was ‘n verjaarsdag om te onthou.

Selgroep – lewende ervaring vir jongmense

Tyd om stil te word, te luister, hande te vat en saam by God se voete as jongmense bymekaar te kom.
In die gesellige atmosfeer van die Oratorium se sitkamer kom ons jongmense weekliks bymekaar. Hier ontdek ons die misterie van God se skepping, hoe Hy innig betrokke is by elke mens se lewe en ‘n pad saam met ons wil stap. Ons het die krag van gebed ervaar en God se teenwoordigheid waar Hy aan mense raak wat soekend is na Hom.
Saam as Christenvriende het ons ‘n kursus van Genesis gedoen en tans is ons besig met ‘n studie oor gebed. ‘n Ontspannende tydjie word ook altyd ingeruim waar ons heerlik kuier hetsy in ons eie koffiekroeg, by die Glen of in Melville.
In almal se besige program is die uur of twee wat ons weekliks afstaan ‘n wonderlike en verrykende ervaring en ons wil alle naskoolse jongmense, studente en jonggetroudes uitnooi om saam met ons die skatte van die hemel te ontdek!

- Adele Calitz

Twee lede van die selgroep, Adéle Crafford en Jaco Calitz, is op 19 Februarie
in die huwelik bevestig deur dr. Christo van Rensburg. Ons gelukwense aan hulle.

Dr. André Basson na Kanada

Dr. André Basson is vir baie jare ‘n bekende in ons gemeente en het hier ook as ouderling gedien. Hy het begin April na Kanada vertrek waar hy ‘n leraarspos aanvaar het. Hy is gevra om meer te vertel van die gemeente waarin hy sal dien. Hy vertel:
Die Niagara Falls CRC is ‘n baie klein gemeente (ongeveer 45 families) en feitlik binne loopafstand van die bekende valle. Die Christian Reformed Church is aan die einde van die vorige eeu gestig deur Hollandse immigrante wat tydens die kerkstryd in Nederland besluit het om hulle in Noord-Amerika te vestig. Hulle het spoedig hulle eie universiteit gestig, naamlik Calvin College.
Soos die Gereformeerde Kerk in Suid-Afrika aan wie hulle baie na verwant is, voel hulle baie sterk oor Christelike onderwys. Sommige gemeentes verplig lidmate om hulle kinders na CRC skole te stuur. Baie van die kerk se lidmate in Kanada het na die Tweede Wêreldoorlog geïmmigreer. Hier het hulle nou ook ‘n eie, weliswaar baie klein, universiteit, naamlik Redeemer College in Hamilton (Ontario). Meeste van die kerk se gemeentes in Kanada is in die state Ontario, Alberta en British Columbia. In die VSA is daar veral gemeentes in die state Michigan, New Jersey en Kalifonië.
Niagara Falls CRC is al die afgelope 5 jaar sonder ‘n leraar en gevolglik het die gemeente aansienlik gekrimp. Hulle is nietemin vasbeslote om nie hulle deur te sluit nie. Naas my werk in die gemeente hoop ek ook om dienste vir Suid-Afrikaners van veral die drie susterskerke wat hulle in die Toronto omgewing bevind, te reël. Samesprekings oor so ‘n aksie is reeds met dr. Willie Botha, Sekretaris vir Leer en Aktuele Sake van die NGK, gevoer.

Handsokker vir die jonges

Van die 16 jonges wat hulle name op ‘n lys geplaas het om die handsokkeraand van Richard Crafford op 17 Maart by te woon, het net vier opgedaag. Hulle verskyn op die foto hieronder. Die ander 12 het nie hulle voorneme uitgevoer nie.

Nuus van die Bybelgenootskap

Bibliathon 2000 is ‘n projek waardeur die Bybelgenootskap, in samewerking met die Christengemeenskap, R15 miljoen wil insamel om in Bybelbehoeftes in Suid-Afrika en regdeur die wêreld te voorsien.
Oral is aksies beplan om te help met fondsinsameling. Dit wissel van staptogte, fietsry, tot gewigsafname waar R15 vir elke kilogram verloor, geskenk word – maar R30 vir elke kg. toename.
In die Comrades Marathon gaan atlete met borgskappe vir Bybels hardloop.
Die Bybelgenootskap het die Millenniumbybel met ‘n geslagsregister voorin die lig laat sien. Ons Deel die Woord CD is ‘n prag-samestelling van bekende kunstenaars wat nuwe geestelike liedere sing.
Die groot dag vir Bibliathon 2000 is 2 September. SABC 2 gaan van 09:00 to 13:00 op die lug wees met ‘n reuse insamelingspoging.
Kom ons bid ernstig vir hierdie groot strewe van die Bybelgenootskap.

Proe-oggend sorg vir heerlike disse

Op 19 Maart 2000, net na die Nagmaal het al die gemeentelede agtergebly, ‘n teelepel en piering in die hand gekry en R10 betaal om te proe. Hierdie oggend was ‘n fondsinsamelingspoging van die vroue om die tekort op die gemeentebegroting aan te vul.
Wat ‘n lekker kuieroggend was dit toe nie! Almal kon heerlik proe aan die vindingrykheid van baie van ons eie vroue - en ons eie dominee. Daar was heerlike groentegeregte, vleisgeregte, onder andere dr. Christo se kerriefrikkadelle, slaaie en sowaar nageregte ook.
Uit elke blok het ons 4 of 5 vroue of broers gevra om elk hul gunstelinggereg vir ons te skenk – dit was so suksesvol dat ons ‘n resepteboekie, nl. "Townsview Treffers" eersdaags die lig gaan laat sien. Daar was baie versoeke dat ons hierdie gesellige oggend ‘n instelling moet maak.
Ons wil baie dankie sê aan almal wat meegehelp het om hiervan ‘n groot sukses te maak – ook aan Richard en Estelle vir die groot opruim na die tyd. Ons het die mooi bedrag van R1 300 daardie oggend ingesamel.

Besoek aan Maria Kloppers Kinderhawe

Drie van ons vrouelidmate het onlangs by Maria Kloppers Kinderhawe gekuier. Die babasaal was eintlik die plek waar hulle aandag gefokus was. Die kleintjies is bederf met koekies en koeldrank en met deernis vasgehou.

'n Personeellid, Kobie Smal en Minneke du Plooy

Nagmaal op suur noot gevier

Met elke teug het ‘n mond soos ‘n gedroogde pruim geplooi. Elke slukkie was beslis nie ‘n meesterstuk nie. Iemand wat ‘n goeie blik op die Nagmaaltafel gehad het, bevestig: Daar was nog nooit soveel "suurgesig" ouderlinge nie.
Dit het geen fynproewer geverg om te oordeel dat die Nagmaalwyn wat uitgedeel is, nie die ware Jakob was nie.
Is die wyn by een of ander obskure winkeltjie gekoop? Het iemand daarmee gepeuter? Was dit ’n kerkraadsbesluit dat die gewone soetwyn vervang moes word?
Die waarheid het eers later aan die lig gekom. Die aankoper van die wyn – hy bly anoniem – het weens ‘n vergissing eers laat Saterdag vasgestel dat dit die volgende dag Nagmaal sou wees en dat daar te min wyn was.
Haastig moes ‘n bottel wyn iewers opgespoor word. Dat die skuldige so min van wyn weet, strek hom tot eer. ‘n Bottel Tassenberg droë rooi wyn is dankbaar iewers opgeraap en siedaar, ‘n klomp kelkies is daaruit gevul!
Ongelukkig het daar van die wyn oorgebly en vir die volgende Nagmaal is die bottel geledig. ‘n Tweede keer het sommige lidmate skeef opgekyk!