Gemeenteblad van die NG Gemeente Townsview - Februarie 2002

KERSSANGDIENS – 25 NOVEMBER 2001

PROTES TEEN KERSFEES

Ek gaan my koes hou
Hierdie Kersfees;
Horende doof vir "stille nag"
in supermarkte,
Siende blind vir wattesneeu
Teen vensterrame.
Die sluipende ou heer met sy rooimantel
En wit baard gaan ek vermy.

Ek gaan na ons nagtelike somerhemel kyk
En my voorstel hoe die ster
Bokant die stal gelyk.
Ek gaan my ore toestop
Vir die geklingel van sleeklokkies
Om te luister hoe die engele sing.

Ek wil my vasklem aan die krip
Omdat ek só kan vasgryp aan die kruis;
Koningshulde – wierook, mirre, goud –
Uiteindelik géselslae, doringkroon,
vloekhout.

Liena Spies

Die bydrae van hierdie gewillige lidmate tot die Kerssangdiens het weereens gehelp om die gewydheid van Kersfees te beklemtoon en almal oor die betekenis daarvan te laat nadink. Ons bedank hulle daarvoor.

- Kleinkie Engelbrecht


Hannelie Viljoen


Theo Boshoff


Miranda Smit


Riana Vorster


Theo Pieterse


Sondagskoolgroepie


Marike van Zyl


Die Koor

KERKGEBOU WEER NETJIES

Tydens ‘n ondersoek na die toestand van die kerkgebou het die Eiendomskommissie bevind dat daar noodsaaklike instandhoudingswerk gedoen moes word. Sedert die voltooiing van die bouwerk in 1970, is daar nog nie veel aan die buitewerk gedoen nie en na 31 jaar was dit seker weer nodig. Dit was veral die nok en oorhang van die dak, gepleisterde muurpanele, vensterrame, houtwerk, asook die toring, wat aandag nodig gehad het. In die proses om jarelange verweer reg te stel, sou die kerk dan ook met ‘n netjieser aansig kon pronk.

Terwyl die steierwerk opgerig was, het ons van die geleentheid gebruik gemaak om die kerkklok, wat sedert 1976 buite werking was, te herstel. Dirk Nel en Nannie en Roelf Beyers was die manne wat die hoogte trotseer het en die nodige gedoen het. Nou kan die klok weer lui.

Om die werk gedoen te kry, het die Kerkraad besluit om fondse uit die belegging aan te wend met die gedagte om dit mettertyd weer aan te vul. Ons is egter dankbaar vir ‘n oud-lidmaat, mnr Hansie Nel van die kontrakteurs, wat die werk teen ‘n baie billike prys vir ons gedoen het. Dankie ook aan Albert van Wyk en die Eiendomskommissie vir die organisering en toesig. Ons glo dat ons kerkgebou nou weer vir die volgende 30 jaar as baken vir die evangelie in die suide van Johannesburg kan staan alvorens daar weer instandhouding gedoen sal moet word.

- Ds. Christie van Zyl

SOOS KORALE IN SY KONINKRYK

Smag jy daarna om te weet wat God se maatstawwe vir sukses is? Voed jouself dan met die ewige waarhede wat in hierdie Bybelstudie opgesluit is. Die elf studies ondersoek Bybelse riglyne vir ‘n godvrugtige lewe. Kom ontdek voortreflikheid op enige terrein!

VOLKOME VERTROUE

Is jy gereed om die volgende tree op jou geestelike reis te neem? Deur eietydse vertellings en ‘n deeglike ondersoek van die Woord lei die skrywer ons om die eenvoudige waarhede van ‘n vrugtevolle gebedslewe te ontdek. Kom deel in die gawe van kommunikasie met God. Hierdie Bybelstudie is geskik vir persoonlike en groepstudie. Dit sluit ook ‘n handleiding vir groepleiers in.

 

Dopelinge

Ons kindjie is gedoop:

  • Karmen en Mikaylee van mnr en mev B J Jansen van Glenvista.
  • Amy van mnr en mev Lynch van Mulbarton.
  • Claudia van mnr en mev Dry van Glenvista.
 In Memoriam

Tannie van Wyk, Constantia Mews 7, Bassonia.
Mnr Bezuidenhout van Noordstraat, Rose Acres.

Ons innige meegevoel word betuig met hulle familie, asook met Franscois en Hester Gersbach wie se vader oorlede is.

Onthou om te Onthou

  • 20 Februarie Ringsaamtrek Deo Gloria.

  • 1 Maart Wêreldbiddag vir Vroue.

  • 2 Maart Rommelverkoping.

  • 2 Maart Wêreldbiddag vir Mans.

  • 6 Maart Stillekrag-Intergroepdag.

  • 14 April Nagmaal met proe-ete daarna.

  • 17 April Stillekrag-byeenkoms.

  • 1 Mei Gemeentebasaar.

  • 9 Mei Hemelvaartsdiens om 19:00.

  • 13 – 17 Mei Pinksterbiduur om 19:00.

  • Geestelike boeke sal beskikbaar wees.

 

Nuwe lidmate

Baie welkom aan mnr O C Fourie van Crozierstraat 9, Townsview.

Hemelse Telefoonnommers

Wanneer jy ontsteld is, skakel Joh 14.
Wanneer jy gesondig het, skakel Ps 51.
Wanneer jy voel alles is weggevat, skakel Matt 6:19-21.
Wanneer jy bang is, skakel Ps 91.
Wanneer jy vertroue verloor, skakel 1 Kor 13.
Wanneer jy rus en vrede soek, skakel Matt 11:25-30.
Wanneer jy aanmoediging soek, skakel Josua 1.
Wanneer jy neerslagtig voel, skakel Ps 27.
Wanneer jy bitter en krities is, skakel 1 Kor 13.
Wanneer jy alleen is, skakel Ps 23.

Noodnommers kan direk geskakel word. Al die lyne is 24 uur per dag oop. Skakel gerus!!

SODAT NIE EEN VERLORE GAAN NIE…

Al die gemeente-aktiwiteite vir die jaar is op geestelike groei gerig. Die Kerkraad wil graag by wyse van al die aksies groter deelname en betrokkenheid van lidmate bevorder. Dit word al hoe belangriker vir Christene om mekaar by te staan en saam te deel in die aanbidding en diens van die Here.

Hier volg ‘n paar belangrike aktiwiteite wat vir 2002 beplan word:

  • SONDAGPROGRAM

Daar sal voortaan net een oggenddiens wees en wel om 09:00, met die Kategese en Bybelskool direk daarna om 10:00. Die Kinderdiens sal ook om 09:00 in die Oratorium plaasvind op die Sondae soos op die jaarkalender aangedui.

Vrouediens-aktiwiteite vind ook op Sondae plaas, soos aangekondig.

Aandbyeenkomste, soos aangedui om 18:30, bestaan uit 10 weke van groepaktiwiteite rondom temas uit Handelinge.

Daar word 5 Kerkraadsvergaderings beplan en wel op Sondagaande.

Die maandelikse kleingroepe gaan voort, met die idee om dit verder uit te bou.

  • JEUGKAMP

Die tieners kan hulle reghou vir ‘n opwindende avontuurkamp gedurende die naweek van 26 -28 April.

  • GEMEENTEBASAAR

Hierdie jaar word die basaar gereël vir Woensdag, 1 Mei. Dit is Werkersdag en bied ‘n gulde geleentheid vir die gemeente om saam te verkeer.

  • GEMEENTEKAMP

Die gemeentekamp van 9 -11 Augustus behoort mee te werk om gesinsbande te verstewig, asook om geestelik te groei. Kampgangers gaan interessanthede by mekaar leer en die naweek werklik geniet. Dit is ‘n langnaweek.

  • NUWE WYKSINDELING

Omdat party wyke gekrimp en ander gegroei het, is dit noodsaaklik om weer ‘n indeling te doen. Die Kerkraad sal lidmate inlig oor die nuwe indeling. Die verdeling van die predikantswyke sien ook nou anders daar uit.

  • GEMEENTE-ETES

Die Nagmaal op Sondae is ‘n tyd vir saameet en bied geleentheid om die gemeensaamheid van die Nagmaal voort te sit. Ons hoop meer gemeentelede sal hieraan deelneem.

  • BYBELSTUDIE

Die groepe op Woensdae en Donderdae onder leiding van die leraars gaan voort.

  • WEBBLAD

Lidmate kan gerus meer aanteken op die gemeente-webblad by www.ngtownsview.org. Ons beoog om dit verder uit te bou.

  • SENDING

‘n Evangelisasie-uitreik d.m.v. die Mattheus-video word beoog. Dit sal gemik wees op die breë gemeenskap in ons omgewing.

Die gemeentevisie bly: Sodat nie een verlore gaan nie deur liefde vir God en ons naaste. Mag dit ook waar wees van 2002 en mag alles wat in Townsview gebeur die Here tot eer en aanbidding strek.

- Ds. Christie van Zyl

Turn the Tide… In Mei 2002

Verbeel jou wat kan gebeur as 1 000 000 gelowiges op 1 000 plekke en in 10 verskillende lande God vra om hulle en Afrika te seën!
Dink aan die lewensverandering wat drie deurbraak-seminare met dr Bruce Wilkinson teweeg kan bring. Dit is Turn the Tide – ‘n gesamentlike aksie van WorldTeach, Judea Harvest en NUPSA – ‘n geleentheid gebore uit ‘n visie om herlewing op ons subkontinent; ‘n visie om die gety van sonde en wanhoop om te keer.
Jy word hiermee uitgenooi om deel te word van Turn the Tide deur die seminare van 1 - 5 Mei 2002 by die Dome te Northgate by te woon.
Turn the Tide is waarskynlik die enkele geleentheid met die grootste bywoning, feesviering en uitdaging in die geskiedenis van die kerk in Suidelike Afrika. Wat ‘n wonderlike stuwing van geestelike herlewing!
Die drie hoofseminare is The Prayer of Jabez (1 Mei); The Vision of the Leader (2 & 3 Mei) en A Biblical Portrait of Marriage (4 Mei).
Kom ook na die opleiding, banket, tienerkonsert en NUPSA-gebedsopleiding.
Kom pleit saam met ons en God dat Turn the Tide ‘n geseënde deurbraak vir Afrika sal wees en dat God as die koning van alle tye en kulture gedien mag word.
Gedink dit is ‘n groot geleentheid? Dit is maar ‘n aanloop tot Operation Sunrise in Julie/Augustus waarin 50 miljoen mense in 50 stede in Afrika in 50 dae met die evangelie van Jesus Christus deurdrenk moet word.
Kontak Dirk Lourens as jy deel wil word en wees van hierdie grootse veldtog! Tel 082 421 3216 of 613-5713 n/u.

GEMEENTE VAN CHRISTUS

- Ds. Christie van Zyl

Reeds so vroeg soos in 1757 het C F Gellert die lied Hou Christus self sy Kerk in Stand geskryf en ons sing dit vandag nog op die melodie van Martin Luther. Dis ook in die nuwe Liedboek opgeneem as Lied 477.
Die trefkrag van hierdie lied lê in die feit dat die kerk aan Jesus behoort en dat Hyself dit bewaar. Vir twintig eeue is dit al waar van die Christelike kerk. Daarom dat ons steeds met vrymoedigheid kan saamsing: O, Christen wat op Hom vertrou, u moet geen onheil vrees nie. Sal Hy wat sy gemeente bou, ons nie ‘n toevlug wees nie?
Christus hou self sy kerk in stand.
Tog verdien hierdie universele stelling nadere toeligting, asook die regte interpretasie.
Die kerk sou na aanleiding van so ‘n uitspraak kon droom dat hy van vervolging gevrywaar kon wees en onthef van enige las of teenspoed. Dit kan beteken dat die gemeente rustig kan voortleef onder die indruk dat God vir alles sal sorg en ongekwalifiseerd sy goeie werk sal doen. Gevolglik kan die verkeerde idee by die kerk leef dat Christus eintlik in diens van die kerk is, eerder as andersom.
Nee, om die woorde van Lied 477 reg te verstaan en om daaruit versterk en opgebou te word, moet ons gelowiges met die volgende paar sake rekening hou:
GOD DRIE-ENIG IS REGVERDIG EN GENADIG
God is ‘n persoonlike God en Hy is die Waarheid. Hy openbaar Homself as Vader, Seun en Gees wat oor alles wat bestaan heerskappy voer. Daarom veroordeel Hy die bose en straf Hy sonde. Maar Hy betoon sy liefde en genade aan almal wat in Hom glo en op Hom vertrou.
DIE BYBEL IS GOD SE WOORD AAN ONS
Deur sy Woord maak God sy wil aan die mense bekend met die doel dat hulle daarvolgens sal leef. Dit is dus ‘n gegewe dat die gemeente baie ernstig sal luister na, en meedoen aan, die wil van God. En dit moet plaasvind binne die tyd en omstandighede waarin die gemeente daagliks bestaan. Die kerk van vandag staan dus voor die uitdaging om te midde van huidige versoekings ywerig te soek na Gods wil en om daaraan gehoor te gee. Natuurlik is dit in ‘n moderne eeu met totaal nuwe omstandighede nie maklik nie. Dit is ook nie altyd presies duidelik wat God se wil in alle omstandighede is nie. Nogtans mag die kerk nooit terugdeins teen sulke versoekings en onduidelikhede nie, maar eerder met groter erns en toewyding indelf in die skatte van Gods Woord ten einde sy bedoelings vir ons lewe te ontdek. Hoewel die Bybel ‘n geloofsboek is wat eeue gelede geskryf is en die verhaal oor God en sy mense vertel, moet dit vandag met alle beskikbare wetenskaplike hulpmiddels bestudeer word ten einde die bedoelings en boodskap daarvan te verstaan en ook uit te bring by die mense wat vandag leef. Die Bybel is steeds die Woord van God wat ook in ons tyd die volk van God duidelik en doelgerig leer en lei. Bybelstudie en prediking is dus uiters aktueel en van groot belang vir die gemeente.
DIE GEMEENTE LEEF IN ‘N GELOOFSVERHOUDING MET GOD
God is ‘n lewende God en ons weet en glo dit. Hy is ook daagliks met sy kerk besig en op pad. Hoewel die gemeente vooruitsien na die tweede koms van Christus wat alles nuut gaan maak, is God elke dag werkend teenwoordig en besig om betekenis en inhoud aan mense se lewens te gee. Hy soek mense op en leef met hulle in ‘n verhouding. Om kerk van Christus te wees, beteken dus ten diepste om op God se soeke te reageer; om daarop te antwoord met geloof en in gehoorsaamheid. God se gesag moet dus aanvaar word en sy wil geëer word. En wanneer dit gebeur, sal God sonder voorbehoud sy kerk in stand hou. Die welsyn van die kerk hang dus van God af, maar ook van die gemeente. God beskik en die gemeente openbaar geloof.
GELOOF WORD DEUR LIEFDE GEOPENBAAR
Oor God se liefde vir mense behoort daar by ons geen twyfel te wees nie. Dit is reeds in Christus geopenbaar. Maar die geloof in God word ook deur liefde betoon. Ons liefde vir God is die bewys dat ons in Hom glo. En dié liefde mond uit in dade. Dit is dade van gehoorsaamheid aan Gods Woord en het ook betrekking op ons medemens.
LIEFDESGELOOF IN 2002
Hoe is dit moontlik om die liefdesbeginsels van die Bybel in die jaar 2002 te laat leef, veral wanneer ons so bewus is van die min liefde en geloof in ons wêreld?
Dit word juis moontlik deur Jesus Christus wat ook in ons moderne tyd sy kerk deur sy Woord en Gees in stand hou. Hyself maak dit vir ons moontlik om te glo en om lief te hê. Daarom kan ons dit op ons beurt weer doen. Ons kan mekaar vergewe soos Hy ons vergewe en in nuwe betekenisvolle verhoudings met mekaar leef. Ons kan ook uitreik na mekaar en vir mekaar tot hulp en van krag wees wanneer ons voel die lewe raak vir ons te veel. Ons kan die nood van ander raaksien en werklik ‘n verskil aan hul omstandighede maak, of dit armoede, hongersnood, siektes, eensaamheid, of wat ookal sou wees.
Dit is dan wanneer God sy kerk in stand hou; wanneer ons met Hom en met mekaar besig is.
Mag die Heer se seën ook in 2002 met sy gemeente wees.

- Ds. Christie van Zyl

‘n Geseënde Sondagskooljaar

Wat ‘n wonderlike voorreg om ons kinders te sien grootword! Met bonsende harte en baie trots was dit lekker om die afsluitingskonsert van die Sondagskool by te woon. En die verwondering – is dit werklik ons kinders wat met 'n skrale vier ure se oefening al hierdie dinge kon regkry? En René en haar helpers – hoe het hulle dit reggekry?

En dan in stilte weet ‘n mens, dit is nie ons nie, maar dit is die Here, want mense kan nie sulke dinge in sulke kort tydjies doen nie. So is Townsview se Sondagskool ook. Dit is die Here s’n. Hy voorsien die kategete. Hy dra elke kind in sy hande. Daar is nie probleme nie. Hy gebruik een uur per week om ons kinders vir sy Koninkryk voor te berei. Net ‘n uurtjie wat eendag gaan uitloop in ‘n ewigheidsbelegging.

Dit was ‘n mooi jaar – ‘n geseënde jaar – die Here se jaar. Ons is trots op Townsview se ouers wat hulself so gewillig gee om deur die Here gebruik te word in die lewens van hulle kinders. Boeke is getrou betaal, kollekte is getrou saamgebring, kinders is op- en afgelaai. "Baie dankie" is al wat die Sondagskoolpersoneel en Kerkraad kan sê. Maar ons weet ook dat die Here hierdie bereidwilligheid sal seën.

Die mooiste voorbeeld van die bereidwilligheid was waarskynlik die afsluiting. Weereens is die gemeente gevra om geskenkies vir Huis Bouwer te gee en om verversings te verskaf. En weereens is daar in oorvloed gegee. Soveel dat ons vir Huis Bouwer heelwat verversings kon saamstuur sodat ook hulle Kersgety aangenaam mag wees. En Townsview wat sy liefde so pragtig bewys: bereidwillige hande om geskenkies toe te draai, hulp by die tafels, konsertklere wat verniet geleen is, afrigting van kinders en natuurlik, gesiggies waaruit liefde straal vir elkander, maar ook vir die Here.

Ons nederige gebed is dat 2002 ook so sal wees. Dat die Here weereens die leisels styf in sy hande sal hou. Hierdie jaar skop dan ook af met Kategese-opleiding op 27 Januarie te Kemptonpark. Die boeke vir die jaar is reeds bestel. Vir die vierde agtereenvolgende jaar sal ons nie nodig hê om Sondagskoolgelde te verhoog nie danksy geleenthede wat die Here vir ons geskep het.

In die vooruitsig vir 2002 is ‘n spesiale muntlegging sodat die kinders ook hulle bydrae vir die liefdesdiens van die gemeente kan lewer. Maar die grootste wat ons graag oor wil droom en bid is dat die Here Townsview se bereidwilligheid sal raaksien en sal gebruik om ons kinders sierade in sy koninkryk te maak. Dit is tog maar eintlik al waaroor dit gaan.

- Albert de Beer

n lekker kuier daarna…

Ons Sondagskool kinders in aksie tydens die afsluiting

Bybelskoolprogram 2002

Kursus 1

Naam: Ons stap deur die Pentateug/Walk Thru the Pentateuch.
Registrasie: Sondag, 3 Februarie, net na die erediens.
Geleenthede: 10 Sondae (10:10 tot 11:00).
Koste: R60 per persoon (met 1 werkboek) of R20 p/p sonder ‘n werkboek.

Dit is geen wonder dat so baie Christene die Pentateug soos die pes vermy nie. Veral as jy daaraan dink hoe die eerste 5 boeke van die OT deurspek is van verhale oor God se oordeel en wraak. Vergeet ook nie die verwarrende rituele, antieke gebruike en misterieuse gebeure nie...
Hierteenoor kan ons ‘n God met eindelose deernis ontdek wat telkemale die grense van sy wette uit genade vir sy kinders bly verskuif - keer op keer op keer

Kursus 2

Naam: Die Gebed van Jabez/The Prayer of Jabez.
Registrasie: Sondag, 21 Julie, net na die erediens.
Geleenthede: 6 Sondae (10:10 tot 11:00).
Koste: R60 per persoon (met 1 werkboek) of R20 p/p sonder ‘n werkboek.

Is jy gereed om die oorvloedige seën van die Here te beleef? Dr Bruce breek 1 Kronieke 4:10 oop sodat ons na die voorbeeld van Jabez die merkwaardige krag van gebed kan leer ken en hoe dit God se guns, krag en beskerming vir ons ‘oopmaak’. Wanneer jy hierdie waarhede begin toepas, breek jy self deur na ‘n opwindende Christelike lewe soos wat God dit vir jou bedoel het.

Kursus 3

Naam: Die 7 Stappe van Geestelike Groei Deel / The 7 Stages of Spiritual Growth Part .
Registrasie: Sondag, 6 Oktober, net na die erediens.
Geleenthede: 8 Sondae (10:10 tot 11:00).
Koste: R60 per persoon (met 1 werkboek) of R20 p/p sonder ‘n werkboek.

In hierdie revolusionêre nuwe kursus verduidelik dr Bruce Wilkinson die 7 stappe van die Christen se geestelike reis. Ontdek daarby dat die 7 stappe voorspelbaar en dieselfde vir alle Christene is. Die kursus help jou verstaan in watter stap jou geestelike lewe tans is en wat jy moet doen om na die volgende stap in jou verhouding met die Here te kan oorgaan!

 1 Korintiërs 13

Al sal ek die tale van mense en van ingele praat,
Maar ek het die liefde geloop geruil vir die haat,
Dan het ek net ‘n raaslike paraffienblik gekom raak.
Al was ek so slim lat ek nuwe goeterse kan maak,
Maar ek het die Jirre se liefde buite in die son gelat lê,
Dan is ek niks, hoor wat ek hierdie vandag vir jou sê.
Al gee ek my hele bokke weg, net om te die eer te hê
Dan sal al hierdie dinge my nou nog niks gepetaal het nie
As ek nie die liefde uit die jimmel kan geloop haal het nie.
Die regte liefde dié se bek is nooit nie dik nie,
Jy sien hom nie skinder en jy hoor hom nie klik nie,
Hy skrywe die kwaad ok nie in boekietjies op nie.
Die liefde mak alles mooi toe met hom se sawwe karos.
Tale dié hou op, voospellingse verdro en woorde raak los,
Maar liefde dié sal nou tot by ewigheid toe net so bly staan.
Toet ek nou ‘n kind gewas het, toe’t ek sos ‘n kind gedink,
En vandag sien ek niet troewelte in die gorrawaterse blink,
Maar eendag sal ek die Jirre se hele waarlikheid kom weet.
En nou is dit die geloof en die hoop en die liefde wat nou bly staan,
Maar net die liefde sal saam met my na die Jirre se jimmel toe gaan.

Uit: Innie Skylte Vannie Jirre:

Griekwapsalms en ander gedigte deur Hans du Plessis

Dankie, Bybelskool, Dankie

Die Bybelskool het goed afgeskop in 2001. Twee kursusse is aangebied: "Hoe om heilig te lewe in tye van versoeking" en "Hoe om die Woord te lééf". Die twee kursusse is deur meer as 75 verskillende lidmate bygewoon! Met die Bybelskool-afsluiting op 25 November is 52 sertifikate vir getroue bywoning uitgedeel. Tydens die erediens het ds Dirk die tweede kursus afgesluit met ‘n boodskap uit 2 Tim 3 en het hy drie eenvoudige stappe gegee oor hoe Christene weer in die gewoonte kan kom om persoonlike Bybelstudie te doen.

Ds. Dirk Lourens

 

 

Finansiële Inligting

Dit is weereens met groot dankbaarheid teenoor ons Hemelse Vader dat ons kan rapporteer dat dit relatief goed gaan met ons gemeente se finansies. Gemeentes in ons Ring, sowel as in die hele Suid-Afrika, sukkel deesdae met geweldige finansiële druk.

Die Dankoffers tot aan die einde van Desember is ongeveer R26,000.00 kort van die begroting. Dit wek ‘n bietjie kommer en ons wil ‘n beroep op alle lidmate doen om asseblief gereeld u dankoffers te gee. Die aftrekorderstelsel is ook beskikbaar en ons moedig u aan om daarvan gebruik te maak.

Tans is ons besig met die opknapping van die kerkgebou. Die finansiering hiervan word uit ons belegging gedoen. (Die belegging kom van die verkoop van een pastorie ‘n aantal jare gelede.)

Die aankoop van die projektor wat tydens eredienste gebruik word, is gedoen uit donasies uit die gemeente. Ons is baie dankbaar daarvoor.

Aan die einde van Desember was ons kasboeksaldo ongeveer R2,000.00 beter as wat begroot is.

Aan al ons lidmate wat so getrou bydra - al is dit hoe gering - ons hartlike dank. Diegene wat van tyd tot tyd agterweë bly, wil ons versoek om u bydraes gereeld te doen uit dankbaarheid teenoor ons Hemelse Vader.

- Finansiële Kommissie

 

Eerbied Bewys aan "Oumense" ……. Lev. 19:32

Die senior lidmate weet al: die jaarlikse afsluitingsfunksie wat vir hulle aangebied word, is ‘n geleentheid wat hulle nie moet misloop nie. Daar besef hulle opnuut dat hulle lidmate van ‘n gemeente is waar ouderdom as ‘n sierlike kroon beskou word; waar eerbied bewys word aan "oumense".
Die funksie van 14 November was nie ‘n uitsondering nie. Vooraf is ‘n persoonlike uitnodiging by elke senior se huis afgelewer.
Vir die dames wat al die voorbereidings moes doen, was dit ‘n liefdestaak. Annie Veldsman en Chrisna du Ru is reeds vanaf 1989 betrokke. Chrisna vertel van die bevrediging wat sy daaruit put omdat die seniors so waarderend is. Annatjie Beyers het die vrugtekoek gebak. Die Sonskyngroepie het vir elke senior ‘n klein vrugtekoek versier en in ‘n netjiese verpakking versorg.
Selfs lidmate wat nie direk betrokke was nie, het bydraes gelewer. Albert de Beer het die digterlike in hom tot uiting laat kom in vier strofes wat eindig met:
"Dankie Heer… vir wysheid, voorbeeld, hoop en liefde wat ons so uniek van ons gryses ontvang".
Kleinkie Engelbrecht het haar deernis met die oues getoon deur 'n massa veelkleurige blomme te skenk waarmee die saal versier is.
Ds. Christie van Zyl het geopen met Skriflesing (Ps. 65) en gebed en het die seniors bedank vir hulle betekenis vir die gemeente en hulle voorbeeld.
Vir luistergenot het Nikki Serfontein en haar groepie, bestaande uit Idelette, Janco en Sonia, gesorg met sang en voordrag.
Wat is ‘n byeenkoms sonder eet- en drinkgoed? Dit was daar – in oormaat en heerlik!
Die seniors het met dankbaarheid geniet wat met soveel liefde en toewyding aan hulle gebied is. Hulle het met blymoedigheid ervaar dat hulle in Townsview hoog geag word.
Joey Cruywagen het die bedanking namens hulle gedoen.

- Jan Pretorius

Seniors in ‘n gesellige luim

Nikkie Serffontein en haar groepie

 

ONS KINDERS

Die koerante en nuus is oorvol van gruwelnuus oor onregte wat teenoor kinders gepleeg word en ons doodgewone mense is so geskok daardeur dat dit ons soms sonder woorde laat. Dit is verskriklik en ‘n mens sidder om net daaraan te dink, maar hoe sorg ons vir ons kosbare kinders? U sal nou vir my sê dat u kind net die beste van alles kry en ek glo dit. U het u kind baie lief, u is ‘n goeie ouer en sal nooit u kosbare kind afskeep nie. Wat "goeie ouers" soms vergeet, is dat my kind nie net uit sy pragtige liggaampie bestaan nie, maar ook ‘n siel het. Jesus soek na elke lammertjie wat afgedwaal het, maar wat maak ons met hulle? So dikwels op ‘n Sondagoggend, net voor die kerk uitkom, sien jy hierdie pragtige kinders, mooi aangetrek en goed versorg. Pappa of Mamma laai hulle af vir Sondagskool en hulle wag buite op die trappies vir die kerk om uit te kom. As ‘n mens hulle soms so kyk, veral die outjies vir wie dit elke Sondag se patroon is, dan wonder ‘n mens: sou die ouers besef hoe graag ons Hemelse Vader ook hierdie skapies in sy Huis as deel van die gemeente wil hê. Is ons kinders dalk op geestelike gebied "verlore skapies" as gevolg van ons versuim?

GEBED: Vader, help ons om nooit een van u kleintjies te laat struikel deur ons voorbeeld van versuim nie. Laat ons kindertjies tog nie geestelik afgeskeep wees nie!

- Elsabe van Rensburg

Die volgende uitgawe van Die Oproep verskyn D.V. in Mei 2002. Alle skriftelike bydraes moet asseblief voor 15 April 2002 ingehandig word. Skakel Kleinkie by 435-8274 of e-pos helpa@netactive.co.za in dié verband.