|
|
|
NG Gemeente Townsview ENKELE VERKENNENDE GEDAGTES OOR DIE DOOD,
OPSTANDING, HIERNAMAALS EN DIE
HEMEL Ds. Christie van Zyl |
|
|
|
|
|
Dikwels vra Christene vrae
soos : Wat gebeur wanneer 'n mens sterf ? Wanneer gaan die wederkoms van Jesus plaasvind ? Gaan ons liggame eendag regtig uit die graf opstaan ? Indien wel, hoe gaan ons lyk ? Sal ons mekaar in die hiernamaals herken ? Waar is die hemel ? Ongelukkig is die Bybel
(ons enigste bron) nie baie duidelik oor hierdie sake nie. Telkens wanneer
dit wel aan die orde kom, word beeldspraak gebruik wat die feitelike
verstaan van die aangeleentheid moeilik maak. Dis al asof die Here,
wanneer Hy oor dié dinge praat, ons so bietjie wil laat raai en laat
wonder. Miskien is sy bedoeling dat ons die einde as 'n verrassing moet
beleef soos wanneer jy 'n geskenk ontvang. Die geskenk is in papier
toegedraai; jy kan dit sien, daaraan voel en ruik, maar jy mag dit nog nie
oopmaak nie. Omdat dit 'n geskenk is en dus geen bedreiging vir jou inhou
nie, maar eerder die belofte van 'n groot lekkerte is,
kan jy met opgewonde verwagting daarna uitsien.
God wil tog net die beste vir sy kinders gee ! (Rom 8:18) DIE
MENSLIKE BESTAANSWYSE Dit
is 'n gegewe dat mense nadat hulle 'n tyd lank gelewe het, sterwe. Dit is
immers die gevolg op die sondeval van die eerste mens, Adam. (1 Kor 15:21,
22). Daarmee is die ganse aardse skepping in 'n toestand van sonde geplaas
en die loon op die sonde is die dood. (Rom 5:12). In die Bybel word daar
ook 'n perk op mense se lewensjare gelê,
naamlik 70 of 80 jaar. (Ps 90:10, Job
5:26) Beide die Ou en die Nuwe
Testamente openbaar egter 'n verwagting op die ewige lewe oftewel die
hiernamaals. Dit word die ewige koninkryk van God genoem en strek veel
verder as die grense wat tyd en ruimte stel. Wanneer die fisiese aardse
lewe verby is, wag daar vir die mens 'n voortsetting daarvan op 'n ander,
nuwe wyse. Kom ons noem die aantal
jare wat 'n mens fisies leef, die eerste fase van lewe. Die tweede fase van
lewe begin met jou sterwe. Ons moet in gedagte hou dat 'n mens 'n fisiese
en geestelike wese is. Wanneer jy fisies sterf, hou jy dus nie op om te
bestaan nie. Jy bestaan op 'n ander manier voort. Ons noem hierdie tweede
fase van lewe : DIE
TUSSENTOESTAND Oor wat presies gebeur
wanneer 'n mens fisies sterf, het ons nie volledige duidelikheid nie. Ons
weet wel dat jou liggaamsfunksies ophou funksioneer en daar is bepaalde
vereistes waaraan voldoen moet word alvorens 'n mens medies as dood
gesertfiseer kan word. Die Bybel is egter ondubbelsinnig daaroor dat 'n
mens ná die sterwensmoment
geestelik voortbestaan. Vir dié staat van lewe gebruik die Bybel die
term, sjeool (1 Sam 2:6, es 7:11, Ps 16:10), maar laat hom nie in
besonderhede daaroor uit nie. Wat egter wel duidelik is, is die feit dat
die omstandighede van die gelowiges radikaal verskil van dié van die
ongelowiges. Die gelowige se gemeenskap
met God word nie beëindig nie, maar word in die voorportaal van die hemel
(paradys soos Jesus dit noem) voortgesit.
Daar is nie meer sonde, versoekings of enige vorm van lyding nie. (Openb
7:9-17). Tog is daar steeds die afwagting op dit wat volledig en volmaak
is. (Openb 6:9-11). Saam met die tydelikheid
wat die gelowiges in die tussentoestand of doderyk ervaar, verwag die
ongelowiges ook nog 'n gebeure wat die oordeel tot volheid sal voer. DIE
OPSTANDING UIT DIE DOOD Hiermee begin die derde
fase van die mens se lewe en verskil van die eerste twee in die sin
dat dit permanent is en aanhou tot in ewigheid. Daar kom dus geen einde
aan nie. Inderwaarheid was dit waarskynlik God se bedoeling dat die eerste
fase al so moes wees, maar dis deur die sonde verongeluk. Die mens moes
sterf, maar vanweë God se genade word hy uit die dood opgewek en tot
volledige sondelose lewe herstel. Die wyse waarop God hierdie
herskeppingswerk verrig, verdien ons aandag, want daarsonder is die lewe
by God nie moontlik nie. God doen dit deur sy Seun, Jesus Christus wat Hy
na die wêreld stuur om namens die sondaarmense te sterwe. (Rom 5:8-10).
Daardeur verwerf Hy vir die ganse menslike geslag die ewige lewe. Ons noem
dit die evangelie, die goeie nuus en dit is vir jou beskore deur die
geloof in Jesus Christus. Jesus se oorwinning word behaal waar Hy in die
plek van die mense aan die kruis sterwe en begrawe word en self uit die
dood opstaan. Sy opstanding is die bewys en teken van ons eie opstanding
uit die dood. (1 Kor 15:12-19). Daarom huldig die kerk op grond van
Bybelse getuienis die opstanding van die gestorwenes se liggame uit die
grafte. Die tussentoestand is dan verby en die nuwe lewe in die nuwe
Jerusalem begin. Dit is die hemel. Ongelowiges sal ook liggaamlik opstaan,
maar hulle sal die oordeel en strafgerig van God erf. Dit noem die Bybel
die hel. DIE
WEDERKOMS VAN JESUS EN DIE EINDOORDEEL Die
opstanding van die dooies gaan plaasvind tydens die tweede koms van
Christus. (1 Tess 4:13-18). Dan vind die eindoordeel plaas waar almal,
soos in 'n regsgeding aangekla en skuldig bevind sal word. Diegene wat in Christus verlossing gevind het en hul lewens
volgens sy wil geleef het, sal vrygespreek word. Diegene wat dit nie
gedoen het nie, sal die ewige straf ontvang. (Mat 25:31-46). DIE
OPSTANDINGSLIGGAAM In 1 Kor 15 dui die Bybel
'n kontinuïteit
en diskontinuïteit
tussen die aardse liggaam en die opstandingsliggaam aan. Dieselfde mens
wat gesterf het, staan uit die dood op, maar vertoon nou anders. Sy nuwe
bestaanswyse is nie meer gebonde aan aardse beperkings soos sonde, siekte,
smart, pyn, honger en dood nie. Daar sal ook nie meer huwelike aanggaan en
voortgeplant word nie. (Mat 22:30). Die nuwe liggaam is geestelik en nie
gebonde aan tyd en ruimte nie. Dit is deel van en leef in 'n ander
dimensie wat vir ons nog onbekend en vreemd is. Die feit dat Jesus fisies
uit die dood opgestaan het en dit vir ons as bewys en voorbeeld dien, wil
tog hê dat die fisiese liggaam uit die graf sal verreis en deel van die
nuwe mens sal uitmaak. (Mat 28:1-10 ; Joh 20:1-30). Diegene wat tydens die
wederkoms steeds gaan leef, sal nie sterwe nie, maar hulle liggame sal ook
verander word en met onsterflikheid beklee word. Miskien sal hierdie paar
kort opmerkings 'n bietjie meer lig werp op die groot misterie van dit wat
nog in die toekoms lê. Wees egter oortuig daarvan dat Hy wat die Weg, die
Waarheid en die Lewe is, Jesus Christus die weg tot saligheid en nuwe lewe
vir al sy kinders gebaan het. Hy het die dood oorwin. Ds Christie van Zyl NG Gemeente Townsview |