NG Gemeente Townsview
 DIE HERE HET MENSE BAIE LIEF
Die Genadeverbond
Ds. Christie van Zyl

As daar nou een eienskap van God is wat 'n mens nie kan miskyk nie, is dit die feit dat Hy verskriklik geduldig is met mense.  

Ons lees dit baie duidelik in die Ou Testament raak : 

Adam en Eva doen sonde, maar die Here gee hulle nog 'n kans.

Noag weet dat hy tot eer van God moet leef, maar wanneer die mense van sy tyd ongehoorsaam en goddeloos word, straf God hulle. Nogtans gee Hy die aarde met alles daarop nog 'n kans.

Aan Abraham en sy nageslag wat derduisende mense beloop, beloof die Here liefde en trou.

En wanneer die Israeliete in die versengende hitte van die woestyn vir Moses dit moeilik maak, laat God water uit 'n rots stroom en uiteindelik laat Hy hulle die beloofde land binne trek. 

Telkens wanneer bogenoemde en soortgelyke dinge gebeur, praat die Here ook met die mense. Hy gebruik besondere persone wat Hyself daarvoor aangestel het. Maak nie saak wat die betrokke omstandighede is waarbinne dinge gebeur nie, elke keer betoon die Here Hom as getrou en betroubaar en elke keer kom Hy tot die redding van die mense.

Ons kom baie duidelik onder die indruk dat die Here keer op keer min of meer dieselfde pad met die mense van die aarde loop. Wanneer daar iets skeef loop, maak Hy dit reg en agterna gaan Hy met die mense 'n ooreenkoms aan.

Inderwaarheid is dit dieselfde ooreenkoms wat telkens opnuut herhaal word.

Hierdie unieke ooreenkoms noem ons in kerktaal die Verbond. 

Opvallend is die feit dat die inisiatief vir die verbond van God uitgaan. Maar die ander party, naamlik die mens se aandeel is netso belangrik. 'n Ooreenkoms kan slegs tussen twee of meer partye aangegaan word en met almal se instemming. So werk dit ook met die verbond van God.  

God het natuurlik nie nodig om met ons ooreenkomste aan te gaan nie. Tog doen Hy dit. Hy doen dit omdat Hy 'n God van genade en barmhartigheid is en mense liefhet en omdat Hy ons graag wil help en bystaan.

Hy wil nie hê dat een van ons verlore gaan nie .... 

  • Hy is ook nie 'n Persoon wat in Homself gekeer is nie. God is 'n verhoudings-God ; Iemand wat in mense en hul omstandighede belangstel.

  • Hy is die Skepper wat graag sy skepping instand hou.

  • Hy is nie Iemand wat regstaan om te veroordeel nie. Hy wil red.

Tereg mag ons vra :  

Met wie gaan God dan die verbond aan ? 

Is alle mense daarby ingesluit en gebeur dit dan sommer net met hulle ? 

Eintlik het ons hier met 'n groot misterie te doen. Want die Bybel leer ons dat God mense uitverkies. Die uitverkiesing veronderstel egter nie dat God op lukrake manier sommer maar net sy vinger op diegene lê aan wie Hy genade wil betoon nie. Nee, God openbaar Homself deur sy Woord en Gees en mense reageer positief daarop. Dan kan ons eers sê hulle is uitverkies. Om deel van die godsvolk te wees, beteken dus dat jy jou deel van die ooreenkoms oftewel die verbond sal nakom. 

Maar wat beteken die verbond aan God se kinders ? Wat hou dit vir jou in ?   

  • Ons moet onthou dat die verbond 'n belofte is. Dit is die beste gedefinieer dié keer toe die Here met Abraham gesels het. Die Here het gesê :

  • "Ek sal jou God wees en die God van jou nageslag" - Gen 17:7  

  • Almal wat in God glo, is deur hulle geloof kinders van Abraham en behoort dus aan God. Dit is die belofte wat vir gelowiges die anker in hul lewens uitmaak.- Hand 2:39 

  • Die Here sal op grond van sy genadeverbond sy kinders beskerm. Van jou geboorte tot jou dood gaan die Here met jou. Te midde van voorspoed en teëspoed is Hy by jou. Jes 43:2,3 

  • Die Here ken jou. Hy het jou op jou naam geroep Jy behoort aan Hom.  - Jes 43:1 

  • Ook jou toekoms is in Hom verseker. Selfs al moet jy eendag sterf, sal die Here  jou op grond van sy belofte in Jesus Christus uit die dood laat opstaan en aan jou die ewige lewe skenk. - Joh 6:37-40

JESUS CHRISTUS is dus die groot Waarborg waardeur die Here ons van sy liefde en reddingswerk verseker. Hy is die Weg waarlangs die verbond waar word en gesalte kry in 'n mens se lewe. 

Om ons diep onder die indruk van die verbond te bring en dit ook op 'n tasbare en praktiese manier te bevestig, het die Here aan die mense in die tyd van die Ou Testament 'n verbondsteken gegee, naamlik die besnydenis. Dit moes hulle heeltyd herinner aan die waarheid en egtheid van dié besondere ooreenkoms. Ons noem dit 'n teken en seël.

Met die koms en werk van Jesus is die verbond vernuwe.     Hy het die Persoon geword in wie die verbond nuwe betekenis gekry het omdat Jesus met sy liggaam en bloed vir ons sondes betaal het. Soos wat water ons was van vuilheid, was sy bloed ons was van sondeskuld. Daarom is die doop die nuwe teken van God se liefde en trou aan sy kinders. Dit is dus ook vir die kinders van gelowige ouers beskore.  

Nogtans moet elke persoon sy aandeel van die verbond nakom deur positief met sy woord en daad daarop te reageer. 

Om deur die Here raakgesien te word en deur Hom 'n aandeel aan die ooreenkoms tussen God en mens (die verbond) te kry, is 'n besondere voorreg. Dit bring jou werklik by God uit en bevestig die lewende verhouding waarin jy met Hom staan. 

Die verbond plaas egter ook 'n verantwoordelikheid op ons om die Here lief te hê soos wat Hy ons het. Daaraan kan ons slegs uitvoering gee deur die regte gesindheid en 'n lewe van gehoorsaamheid en diens aan Hom, want Hy is ons God, die Verbondsgod. 

 

"Hiervan is ek oortuig : 
geen dood of lewe of engele of bose magte
of teenswoodige of toekomstige dinge
of kragte of hoogte of diepte
of enigiets anders in die skepping
kan ons van die liefde van God skei nie,
die liefde wat daar is in Christus Jesus ons Here." 

Rom 8:38,39

 Ds Christie van Zyl