NED. GEREF. KERK

Townsview

 Paastyd 2010 

Liewe Gemeente

Lydenstyd strek vanaf Aswoensdag (17 Februarie) tot en met Stil Saterdag (3 April).  Aswoensdag is die sewende Woensdag voor Paasfees.  Lydenstyd duur veertig weeksdae en dié getal dui op die tydperk wat Jesus in die woestyn deurgebring het waar Hy deur Satan versoek is.  Die Sondae in Lydenstyd vorm nie deel van hierdie veertig dae nie aangesien elke Sondag 'n viering van die opstanding van Jesus is en dus 'n klein Paasfees op sigself.  Die hoogtepunt van Lydenstyd is die Groot Lydensweek.  Hierdie week begin op Palmsondag (die Sondag voor Paassondag) en eindig met Stil Saterdag.

Die program in ons gemeente om hierdie belangrikste tyd in die kerklike jaar deur te bring, is soos volg:

Op Sondag 21 Maart is daar om 18:30 ’n erediens genaamd Paasherinnering.  Ons reël hierdie gedramatiseerde erediens aangesien heelparty lidmate met Paasnaweek uitstedig is.  Dit sal ook Nagmaal insluit en handel rondom dit wat ons met Goeie Vrydag en Paasfees herdenk.  Na die erediens gaan ons gesellig verkeer in die saal.

Hierdie erediens is vir die hele gemeente en nie net vir diegene wat Paasnaweek uitstedig sal wees nie.  U is natuurlik ook altyd welkom om vriende saam te nooi.

Met Palmsondag (28 Maart) se erediens om 09:00 herdenk ons die Sondag toe Jesus op die rug van ’n donkie Jerusalem binne gery het en die mense palmtakke gewaai en klere voor Hom op die pad oopgegooi het.  Bring asb. palmtakke saam na hierdie erediens.  Dit is ook die laaste Sondag voor ons Sy kruisiging herdenk.

Dan volg ’n reeks meditatiewe dienste gedurende die Groot Lydensweek wat strek vanaf Maandag 29 Maart tot Donderdag 1 April elke aand om 19:00 in die kerk vir ± 30 minute.  Ons dink dag-vir-dag na oor wat tydens daardie onheilspellende week in Jesus se lewe gebeur het voordat Hy gekruisig is.  Dit sal die vorm aanneem van gepaste gewyde musiek, voorlesings en bediening van die Nagmaal in ’n stil en gewyde atmosfeer.

Goeie Vrydag (2 April) is ons erediens om 08:00 met Nagmaal.  Na die erediens gaan ons ’n kruis plant op ’n koppie in ons omgewing.  Die plek is toeganklik met ’n voertuig. 

3 April (stil Saterdag), wanneer ons daaraan dink dat Jesus in die graf was, bring ons elkeen op ons eie in stilte en gewydheid deur en in afwagting op die fees van die opstanding die volgende dag. 

Paasfeesoggend (4 April) ontmoet ons mekaar voor sonop by hierdie kruis vir ’n opstandingsbiduur.  Bring asb. ’n warmfles met koffie en bekers saam.  (Die presiese tyd sal tydens die erediens op Goeie Vrydag bekend gemaak word.)  Om 09:00 is ons Paasfees-erediens soos gewoonlik.  Bring asb. enige wit blomme saam vir ’n seremonie tydens die erediens.  Daarna kuier ons saam in die saal om die vreugde van die opstanding verder te vier.  Elkeen bring asb. ’n bordjie eetgoed saam vir die geselligheid na die erediens.

Op 18 April – die derde Sondag in Paastyd - word die erediens om 09:00 ingerig as ’n Paassangdiens.

Ons vertrou dat u hierin sal kan deel en dat die moeite wat ons doen daartoe sal bydrae dat Paasfees – die belangrikste fees in ’n christen se lewe - vir u ’n spesiale belewenis sal wees.

Geseënde Paastyd