BYBELLEES

23 – 29 Augustus 2009

DAG 1:  Lees Gen 24:4-7 & 50-52

Dink na: Abraham het geleer dat mens die Here maar kan vertrou.  Abraham maak seker dat wat by doen nie dalk in die Here se pad staan nie.

Gebed: Here, dankie dat ons U volledig kan vertrou.  Bewaar ons asseblief daarvan dat ons ooit in die pad sal staan van U werk. 

DAG 2:  Lees Gen 25:7, 19-23

Dink na: Weer het ons met ‘n vrou te make wat eers nie kinders kon hê nie.  Die Here het Rebekka dan aan Isak gegee?!  Isak bid en die Here verander haar lot – sy raak swanger.  Die Here vernader haar lot, want Hy kan.

Gebed: Here, dankie dat U gebede verhoor en Rebekka se lot vernader het.  Help ons ook onthou dat U die lot van mense wat in ‘n doodloopstraat is, kan verander.

DAG 3:  Lees Gen 25:24-34

Dink na: Hier gaan iets verkeerd loop – dit kan ons maar weet, want elke seun is een van sy ouers se witbroodjie en is voorgetrek.  Voortrekkery lei tot moeilikheid. 

Dit was – in daardie tyd – ‘n groot voorreg om die oudste seun te wees.  Jy het die meeste geërf van jou ouers, maar ook die verantwoordelikheid gehad om vir jou ouers te sorg tot hul dood – ook ‘n voorreg.  Esau het nie veel van sy voorregte gedink nie en verruil dit sommer vir ‘n pot sop !

Gebed: Hemelse Vader, baie dankie vir al die voorregte wat ons elke dag het.  Bewaar ons daarvan dat ons dit nie meer as voorregte sien of belangrik ag nie.

DAG 4:  Lees Gen 27:1-7

Dink na:  Hier begin ons lees van wat kom as ouers kinders voortrek – dit lei tot moeilikheid.  Dis lekker om voorgetrek te word, maar dit lei tot onregverdige behamdeling.  Die Here trek niemand voor nie – Hy het almal op hierdie aarde ewe veel lief. 

Gebed: Hemelse Vader, baie dankie dat U nie soos mense maak wat soms witbroodjies het nie.  Dankie dat U ons almal met ewe veel liefde behandel.

DAG 5:  Lees Gen 27:19-29

Dit is skokkend dat ‘n seun sy pa so kan bedrieg – en dit nogal met die hulp en aanmoediging van sy ma.  Dit kom nou van ‘n voortrekkery.  Kinders is veronderstel om hul ouers te eer.  Doen hul dit nie, kom daar moeilikheid.  Kinders, hoe eer en respekteer julle jul ouers?

Gebed: Here, bewaar ons daarvan dat ons mense sal bedrieg, veral nie ons ouers nie, want U leer ons om ons ouers te eer en respekteer.  En U weet altyd die beste. 

DAG 6:  Lees Gen 27:30-41

Esau is verniet so verontwaardig en kwaad oor sy jonger broer die seën van sy pa ontvang het terwyl dit eintlik bedoel is vir die oudste broer, vir Esau.  Hy het dan sy voorreg verruil op ‘n dag toe sy honger maag harder gepraat het as gesonde verstand.  Hy sal nou maar moet “slaap in die bed wat hy opgemaak het” sê ons mos in Afrikaans.  Hy kan niemand kwalik neem nie.

Gebed: Here, bewaar ons asseblief daarvan dat ons die lewe vir onsself moeilik maak omdat ons – willens en wetens - dom of verkeerde besluite neem.